1168 novembre 1, Pisa

In nomine sancte et individue Trinitatis amen. Inter cetera que quibuslibet in aliquo regimine constitutis expediunt, hoc inter laudes famosissimas dignum, hoc a sapientibus congruum, hocque rationabile iudicatur ut amicorum mentes in unitate spiritus et vinculo pacis illese conservent atque amicitias illas operum protestatione perspicua de bonis ad meliora fovendo cum integritate custodiant. Proinde nos, qui subsignamur inferius, Dei gratia Pisanorum consules, clarissimi viri Guilielmi Montispessulani domini, inter alios Pisane civitatis amicos precordialissimi, petitionibus amicabiliter satisfacere cupientes, sueque dilectioni per omnia gratissime nobis assistere decernentes ad restaurationem rerum quas hominibus suis a Pisanis ablatas propriis nobis apicibus intimavit, auctoritate nostra communi senatorumque nostrorum consilio per presentia scripta ponimus et constituimus atque concedimus vobis Guilielmo Piccapan et Bernardo Raimundi atque Petro Martiali Provincialibus, pro vobis et sociis vestris qui continentur in cartula Guilielmi Montispessulani ad nos utique destinata, suscipientibus ordines et recollectas in omnes et per omnes Provincialium partes a Massilia usque Barchinoniam et in ipsis locis que ad solutionem mille et quadringentarum et quadraginta librarum, quas pro vobis et sociis vestris in summa et consolidatione rerum vestrarum et sociorum omnium atque damni totius solvendas. Ordine subnotato convenimus, videlicet ut per singulas Pisanorum duorum falcium saumas, que in quamcumque prefatarum partium introducentur, de mergoliensibus denarii duodecim et per unamquamque in exitu eris et stagni saumam denarii tres item de mergoliensibus torscellos singulos marinos et per, legales vulgo dictos, eiusdem monete solidi quinque in exitu tollantur ac recipiantur et usque ad iam dictarum librarum satisfactionem vobis dentur et persolvantur a baiulis tamen et recollectoribus Pisanorum, in locis iam nominatis, de introitu et exitu, sub iuramento constituendis. Qua solutione peracta, prafati ordines et recollecte iamfate deleantur et penitus destruantur.
Actum Pisis, anno salutifere incarnationis millesimo centesimo sexagesimo nono, indictione secunda, ipsa die kalendarum novembrium(a) et positum atque constitutum per subnotatos consules Gerardum de Sancto Cassiano, Ildebrandum Homicii et Ildebrandum Martii, Ugonem Pagani, Turchium et Opithonem iudicem, Lambertum de Curte, Petrum Belle, Vectularium et Raimundum Raimundelli et Bernardum Cinnami et Alamannum.