1174 marzo 4, Pisa

In nomine Patris et Filii et Spiritus Sancti amen. Ego Petrus Gualterius, legatus domine Ermingiardis gloriosissime Narbonensis vicecomitisse et Aimerigi eius nepotis et consulum et aliorum proborum virorum Narbone , iuro ad sancta dei evangelia quod bona fide et sine malo ingenio studebo et operam dabo quod domina Ermingiardisfaciat iurare pacem secundum quod [con]suevit, quod ab hodie in antea omnibus diebus vite sue firmam et veram pacem tenebit Pisane civitati et omnibus hominibus qui modo de Pisano districtu sunt vel in antea erunt, videlicet quod salvabit eos et omnes res eorum in terra et mari, in stagnis et fluminibus, in portibus, in introitibus et exitibus, in eundo et redeundo, sanos et naufragos, et qualicumque modo venerint in potestativum suum, salvabit eos bona fide sine malo ingenio in toto districto suo. Si vero aliquando contigerit quod homines de suo potestativo offendant homines de districtu Pisano, postquam domina Ermingiardis Narbonensis vicecomitissa certis litteris comuni sigillo eorum sigillatis vel eorum certo nuntio fuerit inquisita, infra quadraginta dies secundum rationem, more sue ire inde plenam iusticiam fieri faciat. Hec omnia suprascripta de pace, ipsa domina Ermingiardis tenebit et attendere faciet bona fide et sine malo ingenio et ipsa consules Narbone et duos alios probos viros Narbone hanc pacem firmam tenere et observare iurare faciet et alios sequentes consules hanc pacem firmam tenere iurare facient et hec observabit et complebit infra viginti dies ex quo a Pisanis consulibus, per eorum certas litteras eorum sigillo sigillatas vel eorum certum nuntium, inde fuerit inquisita.
Actum Pisis in ballatorio ecclesie Sancti Xisti, anno dominice incarnationis millesimo centesimo septuagesimo quarto, quarto nonas martii, indictione septima. In presentia et testimonio Ormanni domini Paganelli et Petri quondam Butti et Boniaccorsi (a) quondam Marignani de Barba et Henrigi de Cane et Berardi de Scorno et Ildebrandi quondam Rufi de Pectore et Boniviani(b) quondam Ugonis et aliorum plurium bonorum hominum civium Pisane civitatis.