1177 febbraio 6, Montpellier

In eterni Dei nomine, amen. Ab incarnatione quoque Domini nostri Iesu Christi anno MCLXXVII, indictione decima, octavo idus febroarii. Ego Ildebrandus quondam Sismundi filius et divina gratia Pisanorum consul et in Provincia legatus, ac regi Arago (num) comitique Sancti Egidii et causa missaticie missus in Montempessolanum, auctoritate, consilio, mandato et voluntate consulum omnium Pisanorum et totius Pisane civitatis, per consules Pisanos presentes et futuros, et per totam civitatem Pisanam, et per omnes illos homines presentes et futuros qui ad iurisdictionem Pisane pertinent civitatis, tale pactum et sollempnem facio conventionem cum Guillelmo, Montispessulani domino et quondam Mathildis filio, et Iohanne scilicet Magal (onensi) episcopo et Guidone Guerregiato ac Iohanne Bertulfi, Montispessulani bailo, et omnibus probis hominibus Montispessulani presentibus et futuris. Omnes vero homines Montispessulani et omnes illos homines qui ad iurisdictionem domini Guillelmi Montispessulani pertinent, cum omnibus rebus suis, in hunc modum securos facimus infra civitatem Pisanam et extra civitatem Pisanam in toto posse civium Pisanorum et omnium hominum pertinentium ad iurisdictionem civitatis Pisane, ut sint salvi atque securi cum omnibus rebus suis, per aquam scilicet et per terram, stando, eundo, intrando, exeundo et redeundo. Et per aliquam offensionem, que retro temporibus sit perpetrata vel in antea perpetretur inter Pisanos et homines Montispessulani, homines Montispessulani, vel illi qui iurisdictionis suntdomini Montispessulani, vel res eorum, non offendantur in mari vel in terra, per pacem vel per guerram, nec detineantur per Pisanos nec per illos homines qui iurisdictionis sint vel fuerint civitatis Pisane, nisi propria offenderit culpa. Si vero extranea seu extera persona homines domini Montispessulani in toto posse Pisanorum vel hominum eorum iurisdictionis nocuerit, homines domini Montispessulani vindictam inde sumant et cum illa vindicta in posse Pisanorum et eorum qui eius sunt iurisdictionis regressum et refugium plenarie habeant. Omnes vero homines domini Montispessulani et eius iurisdictionis cum omnibus rebus et navibus et galeis et scaphis et bucis et aliis lingnis in aqua et in terra, in mari, in fluminibus, sive sani sint vel naufragi, stando, intrando et exeundo et redeundo, per pacem et per guerram, salvi sint semper atque securi ex parte Pisanorum et omnium hominum eorum iurisdictionis, itaquod non fatigentur pro petendo seu in petendo sigillo vel aliqua alia securitate, sed sicut cum amicis et hominibus nostre pacis in navibus et extra naves nostri cum eis participent dilectionem et eos tueantur.
Actum apud Montempessulanum, in domo Pisanorum, presentibus Rainerio Corsi, Pandulfo Blanci, Henrico eius filio, Guifredo et Henrico Quatuormanuum, Musca de Kinthica, Petro Arnulfi, Bernardo Butuffi, Geraldo Pandi, Rainerio de Rivolta, Rainerio Cofinelli, Tenperto Granelli, Cerbone, Nicola, Geraldo Lairoso, Guidone Pagani, Guidone Luciforis , Guitifredo Balbi, Parisio (a) di Vico. Et de burgensibus Iohanne Bertulfi baiulo, Guillelmo Holrici, Guillelmo Ildebrandi, Berengario et Bernardo Lamberto, Gerbaldo, Raimundo de Girunda, Stephano de Conchis, Raimundo de Fontanis, Dario, Ugone et Guillelmo de Crecio, Pellegrino, Geraldo Monacho, Petro de Carcasona, Raimundo Grosso, Bernardo de Montels, Raimundo Bertrandi, Fulco notario et me Ugone notario presente quondam Bernardi Marignani, qui predicti consulis mandato predicta omnia scripsi.
Que suprascripta dominus Ildebrandus , Pisane urbis consul, in eodem loco, et dictis presentibus, confirmavit et pro se et sociis presentibus et futuris et pro toto Pisane urbis populo et sue iurisdictionis presente et futuro, firma esse promisit in perpetuum et incorruptibilia.
Hec carta consignata est sigillo dicti Ildebrandi , Pisane urbis consulis et legati.
(SN) (b) Ego Ugo, domini excellentissimi Romanorum imperatoris sepeque triumphatoris Frederici et augusti publicus tabellio, et quondam Bernardi Marignani filius, predictis omnibus interfui, et scripsi atque firmavi.