1208 luglio 27, Fos

In nomine Patris et Filii et Spiritus Sancti amen. Ex hac publica literarum serie manifestum sit cunctis audientibus quod nos domini et marchiones de Fos et de eius districtu et tenemento, scilicet ego Amelius de Fosso et ego Uilelmus Portelleti et ego Gido de Cavallone et ego Raimundus Gaufredi, nostrorum ipsorum habito sano consilio et habito consilio nostrarum nobilium personarum et proborum virorum predicti castri, gaudentes audivimus pacem nobis missam a nobili et ab egregia civitate Pise et a domino Matheo de Corrigia, Pisanorum potestate, et a consulibus et a discretis viris ipsius civitatis. Firmiter promittimus pro nobis et pro nostris successoribus et pro omnibus nostris viris qui in castro Fossi vel eius tenemento vel districtu manent, vobis domine (a) Mathee de Corrigia, Pisanorum potestas, et sapientibus consulibus ceterisque omnibus hominibus tam nobilibus quam ignobilibus, qui in civitate Pise manent et eius districtu et tenemento, pacem integram predictam esse tenendam, cum magna concordia et ad sancta Dei evangelia nos omnesdomini de castro Fossi per nos et per nostros successores iuramus. Et homines ipsius castri et eius districtus et tenementi iurare facimus quod ab hodie usque ad annos XX et unum firmam et perfectam pacem tenebimus cum honorifica civitate Pisa et cum predicta nobili potestate Pisanorum , scilicet Matheo de Corrigia, et cum egregiis consulibus et omnibus hominibus ipsius egregie civitatis et eius fortie et districtus, et salvabimus eos in personis et rebus, terra, mari et aqua, sanos et naufragos in castro Fossi et eius toto districtu et tenemento contra omnem personam et locum. Et non offendemus nec offendere faciemus nec consentiemus offessionem fieri alicui homini predicte civitatis vel eius districtus in personis vel in rebus, terra vel aqua. Ei si quis de castro Fossi vel de eius districtu aut tenemento offenderit alicui homini dicte civitatis vel eius districtus vel fortie in personis vel rebus post factam requisitionem ante nos vel consules per nuntium vel per nuntios hominum de Pisa vel per litteras sigillatas(b) sigillo potestatis vel consulum Pise, illud de quo facta fuerit querimonia reddemus vel reddi faciemus, si res extiterit, infra octo dies et hoc si de re fuerit reclamatio. Si vero de quocumque alio fuerit reclamatio iustitiam ex inde reclamatori faciemus vel fieri faciemus et alii pro eo infra XXX dies, aut conventionem ad voluntatem partium et sententiam datam vel conventionem factam firmam et ratam habebimus et tenebimus ac tenere faciemus et executioni (c) mandabimus sine fraude. Et nullum consilium nec adiutorium persone et rei dabimus vel dari faciemus nec hoc detur ab aliqua persona castri Fossi et eius districtus, nec concedemus vel patiemur alicui persone que offendere debeat vel offendere possit predictos homines de Pisa vel de eius fortia vel districtu in persona vel in rebus. Et non mittemus vel mitti faciemus litteras potestati Pisa vel consulibus vel rectoribus eius pro aliqua persona vel pro re alicuius persone que non sit de castro Fossi vel de eius districtu ablata ab hominibus Pise vel de eius districtu vel pro dampno et facto ab eis sive pro ratione ei facienda. Si qua vero offensio facta fuerit infra predictum terminum, non intelligatur propterea pax rupta nec rupta sit, set emendatio debeat fieri. Et non recipiemus consules vel rectores in castro Fossi qui ista omnia in totum firma tenere et observare non iurent nec illi alios sibi sequentes et sic debeat observari usque ad predictum completum XX et unus annorum terminum.
Actum Fossi in loco qui dicitur ad Catenam. Et taliter hec scribere rogavimus Gaufridus Godafridi (d) publicum notarium ispius castri. Ut hec pax firmiter teneatur nos omnes predicti domini de Fosso supra sancta evangelia iuuravimus et isti iIIor consules scilicet Berengarius Gaudin, Raimundus Rostan, Bertranus de Ginac, Ugo Calveria iddem (e) iuraverunt. Et omnes illos similiter iurare fecimus qui in alia carta sunt scripti.
Ego Gaufridus Godafridi nominati castri publicus notarius prefatis interfui et hanc cartam scripsi, complevi et dedi. Anno Dominice incarnationis millesimo ducentesimo nono sexta kalendas augusti.