1224 settembre 19, Pisa

(SN) In nomine Patris et Filii et Spiritus Sancti, amen. Proborum semper est consuetudo virorum, inter quos virtus viget et prevalet, omnem a se scandali materiam amputare et mutuis sese concordie ac pacis federibus conligare. Ideo, ex hac publica licterarum serie, clareat universis quod nos Roggerius et Conradus, vicarii domini Prohini de Inchoardis de Mediolano, domini Pisanorum potestatis(a) absentis, loco et vice predicti Prohini Pisanorum potestatis et eius nomine et nomine Pisani comunis, pro comuni Pisano et civitate Pisana, habito inde concilio senatorum, sequentes formam ipsius consilii, facimus vobis Guilielmo Petri et Bernardo de Leone, consulibus civitatis seu burgi Nerbone, et legatis et nunciis sive missaticis domini Aimerrici(b) , vicecomitis Nerbone, et totius universitatis Nerbone, recipientibus pro domino Arnaldo, Dei gratia Nerbonensi archiepiscopo, et pro domino Aimerico, vicecomite Nerbone, et pro universitate hominum civitatis Nerbone et eius forcie et districtus et pro vobis ipsis, firmam pacem. Et convenimus et promittimus nos suprascripti Rogerius et Conradus, vicarii suprascripti domini Prohini, Pisanorum potestatis absentis, vobis suprascriptis Guilielmo Petri et Bernardo de Leone, consulibus civitatis Nerbone et legatis vel nuntiis sive missaticis domini Aimerici, vicecomitis Nerbone, et totius universitatis Nerbone, recipientibus pro predicto domino Arnaldo, Dei gratia Nerbonensi archiepiscopo, et domino Aymerico, vicecomite Nerbone, et pro universitate hominum civitatis Nerbone et eius forcie et districtus, tenere firmam pacem in personis et havere, terra et aqua, et eos sanos et naufragos in personis et rebus per totam fortiam et districtum Pisane civitatis, salvare et defendere, et eos non offendere nec offendi facere. Et si offensio facta fuerit de personis, infra triginta dies ex quo inde reclamatio Pisanorum potestati seu rectori facta fuerit, convenientem vindictam facere. Si vero de rebus offensio facta fuerit et res extiterit, infra triginta dies ex quo inde reclamatio Pisanorum potestati vel rectori facta fuerit post requisitionem inde ante suprascriptum dominum Prohinum, Pisanorum potestatem, vel eius successores, consules vel potestatem Pisanorum, factam per nuntium vel litteras sigillatas sigillo domini Arnaldi, Dei gratia Nerbonensis archiepiscopi, et domini Aimerrici,, vicecomitis Nerbone, et comunis universitatis Nerbone, illud de quo fuerit querimonia reddi faciemus. Si vero res non extiterit vel inveniri non poterit, faciet inde dominus Prohinus et eius successores iustitiam et rationem secundum bonum usum civitatis Pisane(c), infra suprascriptum terminum et spatium triginta dierum, nisi per reclamatorem remanserit vel causa testium vel instrumentorum, hoc intellecto ut de pena pro rebus ablatis, vel de iniuria, non teneatur Pisanorum potestas seu rector facere rationem nisi sicut superius dictum est, nec ius suum ammitat qui vis sibi dixerit faciendo iniuriam, vel sua auctoritate aliquid accipiendo, hoc salvo quod aliquis homo civitatis Pisane vel eius districtus non conveniatur vel res eius impediantur pro aliqua persona que sit civitatis Pisane vel eius districtus a Nerbonensibus vel ab his qui sunt de eorum districtu nisi fideiussor vel adcessorius. De havere, vero, Nerbonensium quod per riveriam Pisas adductum fuerit aput Decatiam, tollantur denarii quattuor in introitu vel exitu; si vero per pelagus Pisas adductum fuerit, decinum(d) tollatur, et si exierit per pelagus de omni havere unde Decatia data non fuerit, denarii quattuor per libram; quod si per terram adductum fuerit, tollatur ripa inde sicut consuetum est. Predicta vero pax et concordia debeat servari ab hodie usque in annos quadragintanovem proximos. Proinde nos memoratis Rogerius et Conradus, vicarii predicti domini Prohini, Pisanorum Dei gratia potestatis absentis, iuramus ad sancta Dei Evangelia quod hec omnia suprascripta sine fraude et malo ingenio faciemus et observabimus toto tempore regiminis suprascripti domini Prohini, Pisanorum potestatis , et quod faciemus ita quod predictus dominus Prohinus, per se toto tempore sui regiminis, suprascripta omnia firma tenebit, faciet et observabit, et sequentes consules vel rectores sive potestatem hoc idem dominus Prohinus iurare faciet, et quod(e) recipient sibi sequentes consules vel rectores sive potestatem, qui hoc idem non iurent, et illi alios, et sic observetur usque ad predictum terminum completum quadragintanovem annorum. Quod si forte, quod absit, aliquid predictorum, ut dictum est, non fuerit observatum, proptera pax non rumpatur, et id quod non fuerit observatum infra viginti dies ab inquisitione inde facta emendetur. Et taliter prefati Rogerius et Conradus, vicarii domini Prohini, Dei gratia potestatis , me Benencasam, notarium domini imperatoris, hec omnia scribere rogaverint.
Acta sunt hec omnia suprascripta et iurata Pisis, in domo filiorum quondam Ferrantis, presentibus Gaitano Albertini de Bulso et Leone Galgani et Lamberto Galli et Bavera, iurisperitis, et Ugolino Medalliola Vicecomite et Rainerio Frederici et aliis pluribus testibus ad hec rogatis, Dominice incarnationis anno millesimo ducentesimo vicesimo quinto, indictione duodecima, tercio decimo kalendas octubris.
(SN) Ego Benencasa quondam Guilelmi de Perignano domini imperatoris notarius et cancellarie Pisane civitatis scriba publicus predictis interfui et ideo hec omnia fideliter scripsi atque firmavi.